Binəqədi rayonunda Beynəlxalq Əlillər Günü qeyd edilmişdir

Hər il Beynəlxalq Əlillər Gününün Binəqədi rayonunda geniş qeyd olunması artıq ənənə halını almışdır. Əsl bayramsayağı keçirilən bu tədbirlər əlillərin ürəyincə olur, onları sevindirir, fərəhləndirir, yaşayıb-yaratmaq əzmini gücləndirir. Belə vaxtlarda əlillər, ən başlıcası, zəifliklərini unudurlar.

Binəqədi Rayon İcra Hakimiyyətinin təşəbbüsü və maliyyə dəstəyi ilə keçirilən tədbirdə də əlillər yuxarıda qeyd edilən hissləri yaşadılar. “Vüsal” şadlıq evində təşkil olunan ziyafətdə iştirakçıları salamlayan rayon icra hakimiyyəti başçısının müavini Eldar Ağayev əlillərə göstərilən dövlət qayğısından danışmış, ölkə Prezidenti İlham Əliyevin onların problemlərinə, çətinliklərinə həssaslıqla yanaşdığını vurğulamışdır.

Sonra söz əlillərə verilmişdir. Onlar son illər ölkəmizdə sosial-iqtisadi şəraitin yaxşılaşmasından, bütün vətəndaşların, o cümlədən əlillərin məişət problemlərinin həlli istiqamətində atılan addımlardan bəhs etmişlər. Əlillər onların bayramlarda unudulmadıqları, mütəmadi yardımlar göstərilməsi, sosial müdafiələrinin gücləndirilməsi üçün həyata keçirilən tədbirlərə görə rayon icra hakimiyyəti rəhbərliyinə minnətdarlıqlarını bildirmişlər.

Sonda rayon icra hakimiyyəti tərəfindən 110 nəfər əlilə maddi yardım göstərilmişdir.

Vaqif BAYRAMOV

Xalq qəzeti.- 2009.- 4 dekabr.- S. 8.