Dövlət İdarəçilik Akademiyasının dinləyiciləri Səbail Rayon İcra Hakimiyyətində təcrübə keçmişlər

Azərbaycan Respublikasının Prezidenti yanında Dövlət İdarəçilik Akademiyasının Azərbaycanda ailə, qadın və uşaq siyasəti istiqaməti üzrə ixtisasartırma kursunun dinləyiciləri akademiyanın proqramına uyğun olaraq Səbail Rayon İcra Hakimiyyətində təcrübə keçmiş və rayon rəhbərliyi tərəfindən qəbul olunmuşlar.

Respublikanın bir sıra rayon icra hakimiyyəti başçılarının humanitar məsələlər üzrə müavinləri, nazirlik və komitələrin məsul işçiləri, Dövlət İdarəçilik Akademiyası rəhbər kadrların ixtisasının artırılması fakültəsi rəhbərliyinin iştirakı ilə təşkil olunmuş tədbiri giriş sözü ilə Səbail Rayon İcra Hakimiyyətinin başçısı Asif Əsgərov açaraq qonaqları salamladı, ixtisasartırma kursunda təcrübə keçmək üçün məhz Səbail rayonunun seçilməsinə görə, akademiyanın rektoru professor Seyfəddin Qəndilova öz təşəkkürünü bildirdi.

Rayon icra hakimiyyətinin başçısı iştirakçılara ilk öncə Səbail rayonu, onun tarixi barədə ətraflı məlumat verdi, son vaxtlarda rayonda aparılan abadlıq və quruculuq işlərindən danışdı. A.Əsgərov qeyd etdi ki, müstəqil Azərbaycan Respublikasında sosial sahədə dövlət siyasətinin prioritet istiqamətlərindən birini məhz ailə, qadın və uşaq siyasəti təşkil edir. Bu məsələləri daim nəzərə alan ulu öndər Heydər Əliyev respublikamızda bu istiqamətlər üzrə siyasətin formalaşdırılması məsələlərinə böyük diqqət yetirmiş və mövcud problemlərin həlli üçün ardıcıl və məqsədyönlü fəaliyyət göstərmişdir.

Ümummilli liderimizin layiqli davamçısı, Azərbaycan Respublikasının Prezidenti cənab İlham Əliyevin 2006-cı il fevralın 6-da imzaladığı fərmanla Ailə, Qadın və Uşaq Problemləri üzrə Dövlət Komitəsinin formalaşdırılması bu sahədə mövcud olan məsələlərin kompleks şəkildə həlli üçün zəmin yaratmışdır. Həmin il Milli Məclisdə “Gender (kişi və qadınların) bərabərliyinin təminatları haqqında” Qanunun qəbul olunması qadınların sosial statusunun yüksəlməsi istiqamətində mühüm addım olmuşdur. Ölkə başçısının tapşırığı ilə son illərdə respublikada yeni məktəblərin tikintisi, ali, orta və məktəbəqədər təhsil müəssisələrinin, mədəniyyət ocaqlarının əsaslı təmir olunaraq hər cür avadanlıqlarla təchiz edilməsi, həmçinin 2009-cu ilin “Uşaq ili” elan olunması Azərbaycanda sosial sahədə aparılan düzgün siyasətin bariz nəticəsidir.

Daha sonra görüşdə ailə, qadın və uşaq problemləri ilə bağlı müxtəlif mövzularda çıxışlar olmuşdur. Səbail Rayon İcra Hakimiyyəti başçısının birinci müavini Xalidə Bayramova bu istiqamətdə rayonda görülən işlər və keçirilən tədbirlər, RİH-də fəaliyyət göstərən komissiyaların fəaliyyəti barədə ətraflı məlumat vermiş, dinləyiciləri maraqlandıran çoxsaylı sualları cavablandırmışdır.

Tədbirin sonunda Dövlət İdarəçilik Akademiyası rəhbər kadrların ixtisasının artırılması fakültəsinin dekanı, dosent Natiq Qarayev təcrübə mübadiləsi və görüşün yüksək səviyyədə keçirilməsinin təşkilinə görə akademiya rəhbərliyi və dinləyicilər adından Səbail Rayon İcra Hakimiyyəti rəhbərliyinə öz minnətdarlığını bildirmişdir.

Ə.BAYRAMOV

Xalq qəzeti.- 2009.- 19 dekabr.- S. 4.